藥物治療對IBD患者十分重要，但每個患者適合嘅用藥劑量都唔同，點樣先可以達至「劑量最佳化」（dose optimization）？現時主要有兩種方法，需視乎患者情況而定：如病情較輕，可以先用最簡單嘅藥物如5-ASA，再慢慢加上，逐步搵到能控制病情、副作用又唔會好大嘅劑量 ，又或者口服與肛門塞藥 / 灌腸劑雙管齊下等。當中需要較長時間尋找，並且有機會令病情反覆，病情較輕嘅患者先至有呢個空間嘗試。
相反，如果患者病情較嚴重，可能一開始便需要大劑量或較強勁嘅藥物，如生物製劑等來穩定病情，控制好後再慢慢減藥，盡量降低併發症風險。原理上都係用呢兩種方法，每個患者尋找佢哋嘅「劑量最佳化」，但臨床時亦要顧及患者意願，因為每個人都有自己嘅想法，部份患者追求低劑量、減輕副作用，亦有患者只求完全控制病徵。醫患需要一齊訂定目標，先可以達至最合適嘅治療效果。
* 李恒輝醫生提醒：以上內容僅供參考，所有預防及治療方法都有不同的成效、副作用及風險。如有懷疑，請向主診醫護人員查詢。
